« Karo karé la, la énèt apré bann gran batkaré san kozé dann park Monsouris, laba Paris. Mwin la swazi 21 karé po mwin fé in liv i apèl Po in karé blé la tér, mé mwin la pokor rod lédisyon »

« Cette série a pour origine une expérience extra quotidienne inattendue après de longues promenades silencieuses dans le paysage du parc Montsouris, à Paris. J’ai choisi 21 dessins pour réaliser un livre qui s’intitule Po in karé blé la tér qui n’a pas encore été édité ».

Florans Féliks

« In zour
Na anbras la tér dé koté lo syèl…
In zour na anbras lo syèl dé koté la zou… »

Kriké !
Kraké !

Zot i koné,
Lo syèl,
Lo syèl blé, blé, blé minm,
Eh bin ! lo syèl la t’in bout la twal !

In bout la twal siré
Po mon péi anpar la pli
Kan li tonm lot koté la mér…

In bout la twal tisé
Byin séré an twal zérnyé
Po kol tout zwazo i vol
Lwin minm, lot koté la mér…

Lé vré, lé mantér ?!…
Lo syèl t’in bout la twal !

…

Zordi, si ni gard ali byin,
Lo syèl t’in karé la twal vélour
Dési la pant in partér flér
Dési la pant dou in zardinn’kér
Dési la pant in karé la tér…

Ou koné, dann in zardinn’kér
Néna pyédbwa,
Néna santyé
Néna lo ban,
Néna ziska in poubèl
Po pa fé la salté

Dési s’karé la tér
Néna osi in ti partér
Néna osi in bèl pantér
In pantér léstati
Nwar, zoli, zoli, vèy pa !…

In pantér an kolér,
Son ké po fwèt lézér !
Bé ! akoz sa ?

Baya !! in sérpan po mord son ti !
Li la po drés èk li baba !

Ayayayay !!!

Dan in zoli ti karo la tér konmsa !
In pantér an salér dan in zardinn’kér
Alalala, mi di azot, malér l’ariv vitman

Malér l’ariv bonér !!

Aforstan fwèt lé zér
Son ké la kros la twal lo syèl !

Zot i rapèl

Astér, lo syèl i komans filosé,
Lo fil i pandiy, i balans ti dousman si koté,

Li dsann, ti dousman li dsann minm
In bout lo syèl èk li si koté…

Bé !! si tout lo syèl la la dsann ?!
dann sé zoli zardinn’kér
èk son zoli ti partér
bé solon zot
Kosa i sar éspasé ?

Kriké ?
Kraké !

dann kér Silans
riskab i pé trouvé
…

« In zour
Na anbras la tér dé koté lo syèl…
In zour na anbras lo syèl dé koté la zou… »

Florans Féliks, 2019