KAP…KAP

« po la mér po kapkap dosou tro bèl bèl kap la pli
bèl kap la déboulé, pa kaponér sak la rès pri
mon larm la po kodinn po mon figir an po fig mir,
mwin minm lo gri
pa kapab pokor mor
san sèy kapar
kap ankor vér
si pyé d bwadkor mon péi

Yéyéyéyéyéyéyé….

ros si ros dan la fant,
ti boul po déboul dan la pant,
kapor po ral kari sou d ri
promé té (promethée) pokor lér,
Sisyphe n’ankor po ariv anlér
nout fantézi

kap Houssaye ton sagay,
kapital po is son drapo,
desi lo do, dési lo bor
ziska dann por
nout po- krizi
zansèt po fé lo mor
kapitinn, non, pa kap Maryann,
va giny drès dobout mon péi

yéyéyéyéyé….

n’a aspér, talér nout lér
dann kap Orér,
ral pa karang, zis Makabi
kap i tinn pa motér
non pa mantér
tout papa rèv i dor sou d kap
bril san soupap,
kér mon péi

N’a giny ral nout zosay,
tyinbo lo rin,
tir pa sintir,
souk ali for sounouk la Vi
fo ni giny dobout san batay,
san “ kit ta mér ” !!!
san kit nout tér
san ki fé sanm nou in bouyon kokiy

yéyéyéyéyéyé….

tousa pou in bwadkor dan la mér
an simagré, an simantri
bé li riskab fé gonn in zafér
si la pa sirinn, sansa torti
amwin, ma di aou in nafér,
Bé san rad maré
san ra d ’ méri
mi sanz mon bwadébinn kont bwadfér
pa po la ké torti in bouyon kokiy !!!

yéyéyéyéyéyé…..

Soman an atandan
la po mon min monmon po kapkap
dosou tro bèl bèl kap la Vi
sort kap- otaz
nir in kap pod vré
la pa kaponér sat i rèt pri
mon larm la po kodinn po mon figir an po fig mir
mwin minm lo gri
bé si kap nout kor la déboulé,
la sap lo may
dann ton tramay,
souk anou for
Kadou Véli
yéyéyé..yéyéyé….. »

Florans Féliks, 2019